Bosnja e Hercegovina do të nisë aventurën e saj në Kupën e Botës 2026 me një përballje të vështirë ndaj mikpritëses Kanadasë, ndërsa përzgjedhësi Sergej Barbarez pranoi se skuadra e tij konsiderohet favorite e dytë, por ai premtoi se skuadra e tij do të luftojë me zemër në çdo ndeshje.
Bosnja rikthehet në skenën më të madhe të futbollit botëror pas 12 vitesh, pasi pjesëmarrja e vetme e mëparshme ishte në Botërorin e vitit 2014 në Brazil.
“Ne jemi një vend i vogël. Kjo është vetëm Kupa jonë e dytë e Botës dhe sigurisht që në shumë prej ndeshjeve do të konsiderohemi skuadër inferiore”, deklaroi Barbarez në konferencën për media.
Megjithatë, trajneri boshnjak beson se ekipi i tij ka treguar karakter të jashtëzakonshëm për të arritur deri këtu.
“Nëse i shikoni rezultatet tona, mendoj se mund të admironi atë që kemi arritur. Kemi dëshmuar se mund të rivalizojmë me këdo”, shtoi ai.
Bosnja siguroi një nga vendet e fundit në Botëror pasi eliminoi Italinë pas ekzekutimit të penalltive, duke shkaktuar një nga surprizat më të mëdha të kualifikueseve.
Barbarez theksoi se fryma luftarake ka qenë arma kryesore e ekipit të tij.
“Më ka pëlqyer gjithmonë historia e Davidit kundër Goliathit. Ne luajmë me zemër dhe ky ka qenë avantazhi ynë më i madh”, u shpreh ai.
Lajm i mirë për Bosnjën është rikthimi i kapitenit dhe golashënuesit më të mirë në histori të kombëtares, Edin Dzeko. Sulmuesi 40-vjeçar ka lënë pas dëmtimin në shpatull dhe do të jetë i gatshëm për sfidën ndaj Kanadasë.
“Edin do të jetë me ne. Ai do të luajë si zakonisht”, konfirmoi Barbarez.
Trajneri boshnjak pret një duel shumë intensiv ndaj Kanadasë, e cila synon të arrijë për herë të parë në fazën eliminatore të Kupës së Botës dhe do të ketë mbështetjen e tifozëve vendas.
Megjithatë, edhe Bosnja nuk do të jetë e vetme në Toronto, pasi qindra tifozë boshnjakë kanë krijuar një atmosferë të ngrohtë rreth ekipit gjatë ditëve të fundit.
“Ne duam t’i tregojmë botës versionin tonë më të mirë. Duam të fitojmë respekt dhe këtë mund ta arrijmë vetëm duke treguar cilësitë tona në fushë”, përfundoi Barbarez.
Leave a Reply